2014年3月17日 星期一

古文粵譯:登徒子好色賦(重刊)

登徒子好色賦(宋玉)


大夫登徒子侍於楚王,短宋玉曰
楚國既XX司司長登徒子,有一日向楚王篤宋玉背脊:

「玉為人體貌嫻麗,口多微辭,又性好色,願王勿與出入後宮。」
宋玉生得咁靚仔,口甜舌滑,又鬼咁鹹濕,大王你千祈咪俾佢入後宮至好呀。

王以登徒子之言問宋玉。 
楚王就叫宋玉來問下,到底登徒子講D野係真唔係真。

玉曰:「體貌嫻麗,所受於天也;口多微辭,所學於師也。至於好色,臣無有也。」
 宋玉話:生得靚仔,係上天既恩賜;把口識講野,係我阿Sir以前教我教得好者;至於鹹濕,無件咁既事喎。

王曰:「子不好色,亦有說乎?有說則止,無說則退。」 
楚王:你話你唔鹹濕丫,有乜證據先?一係你就即刻講,講唔出我就燉你冬菇!


玉曰:「天下之佳人,莫若楚國;楚國之麗者,莫若臣里;臣里之美者,莫若臣東家之子。 
宋玉話:全世界咁多靚女,最靚係我地楚國既;全楚國咁多靚女,最靚係我住個區既;成個區咁多靚女,最索都係我個包租婆個女咯。

東家之子,增之一分則太長,減之一分則太短;著粉則太白,施朱則太赤。 
講到包租婆個女,佢身材岩岩好,高多一分都太高,矮一分又太矮;佢塊面珠仔,如果搽粉就太白,掃的多胭脂都嫌紅左少少。

眉如翠羽,肌如白雪,腰如束素,齒如含貝。 
佢條眼眉好似雀仔羽毛,D皮膚白雪雪,條腰幼一幼,棚牙又白,好似一排貝殼仔咁。


嫣然一笑,惑陽城,迷下蔡。然此女登墻窺臣三年,至今未許也。 
佢笑一笑,真係殺死人,附近D麻甩佬暈晒浪架。但係佢淨係鍾意我一個唧,仲成日擔張梯擒高,隔住幅圍牆來偷睇我,到而家三年咯,我理都未理過佢。

登徒子則不然。其妻蓬頭攣耳,(齒只)唇歷齒,旁行踽僂,又疥且痔。 
登徒子就唔同咯,大王睇下佢個老婆丫,D頭髮癲雞乸咁,隻耳仔又崎形,崩口唇,棚牙岩岩巉巉,行起路時跛下跛下,成身生癩,重有痔瘡!

登徒子悅之,使有五子。王孰察之,誰為好色者矣。」 
咁既女人,登徒子都中意得落既,仲同佢生左五個仔添!大王您話喇,到底佢同我邊個係鹹濕D丫?



於是楚王稱善,宋玉遂不退。
楚王話宋玉講得有道理,於是唔駛佢燉冬菇。



(文章允許轉貼,請具作者名字:梁煥松)

8 則留言:

  1. 其實東家是否應解釋為東面的鄰居?因為若住同一間屋就不用隔住幅圍牆來偷睇。

    回覆刪除
  2. 大夫譯做楚國既XX司司長 , 會唔會太長氣 , 保持原狀 , 譯做楚國大夫 , 大夫一詞 , 在粵語中都幾通用。

    回覆刪除
  3. 楚王:有人傳你係淫蟲喎。。。

    宋慾:哎喲,寃枉呀聖上!我正人君子一名,深知男女授受不親。。。隔離屋阿東姑啫嘛,波大腰細籮圓,前凸後翹,面珠墩桃花含露,櫻桃小嘴欲拒還迎,雪白水嫩美肌,噢~~~~ 嗱,呢個姣婆日日裝我,我目不邪視,正眼都冇望佢一眼呀!

    楚王:來人呀,準備豬籠!

    回覆刪除
  4. 條友將條女由頭睇到落腳, 仲話自己唔好色, 而楚王竟然仲信, 呢個楚王好打有限.

    回覆刪除
    回覆
    1. 文學創作而已,可能是後人託宋玉名所作。

      刪除
  5. 男人不好色,就如貓不好魚腥。宋玉厲害拆彈,如果語言上兜不贏楚王,就要以好色罪名被燉冬菇。
    到時候,登徒子再對楚王說宋玉還時不時眼金金望著你的大小老婆,宋玉隨時掉腦袋.

    回覆刪除